Миний блог

Бүгд найрамдах Австри улс

Kirden — Fri, 05 Nov 2010 18:08:43 GMT

МОНГОЛ УЛС, БҮГД НАЙРАМДАХ АВСТРИ УЛСЫН
ХАРИЛЦААНЫ ТОВЧ ЛАВЛАХ

Монгол Улс Бүгд Найрамдах Австри Улстай 1963 оны 7 дугаар сарын 1-нд дипломат харилцаа тогтоосон бөгөөд тус улс нь манай улстай дипломат харилцаа тогтоосон өрнөдийн хоёр дахь орон.

Манай тал Австрийг 1963-1975 онд Будапештээс, 1975-1979 онд Берлинээс, 1980-2002 онд дахин Будапештээс хамаарч ажиллаж байгаад 2003 оны 2 дугаар сарын 10-наас Венад ЭСЯ нээн ажиллуулж байна. Австрийн тал манайхыг 1963-1993 онд Москвагаас, 1993 оноос Бээжингээс хамааран ажиллаж байна.

Сүүлийн жилүүдэд хоёр улсын харилцаа идэвжиж байна. Тухайлбал, Австрийн эдийн засаг, хөдөлмөрийн дэд сайд И.Майер 2001 онд, Австрийн Үндэсний хурлын дарга Др.Х.Фишер 2002 онд, Австрийн Холбооны боловсрол, шинжлэх ухаан, соёлын сайд Э.Гээрэр 2003, 2004 онд Монгол Улсад, Монгол Улсын Ерөнхийлөгч 2003 онд, Эрүүл мэндийн сайд П.Нямдаваа 2003 онд, Байгаль орчны сайд У.Барсболд 2004 онд, УИХ-ын дарга Н.Энхбаяр 2005 онд, Монгол Улсын Шадар сайд Ч.Улаан, Түлш, эрчим хүчний сайд Т.Оч ирхүү нар 2005 онд Австри Улсад тус тус айлчилсан.

Манай улсаас өрнөдийн улсуудтай худалдаа, эдийн засгийн салбарт байгуулсан гэрээ хэлэлцээрийн анхных нь болох "Харилцан бараа нийлүүлэх ба төлбөрийн тухай хэлэлцээр”-ийг 1963 онд Австритай байгуулан худалдаа хийж эхэлсэн. Мөн тэрчлэн "Эдийн засгийн гадаад харилцааны тухай хэлэлцээр”-ийг 1992 онд, "Хөрөнгө оруулалтыг хөхиүлэн дэмжих, харилцан хамгаалах тухай хэлэлцээр”-ийг 2001 онд, "Орлого ба хөрөнгийн татварын тухай конвенци (Давхар татварын хэлэлцээр)”-ийг 2003 онд тус тус байгуулсан бөгөөд "Эрүүл мэндийн салбарт хамтран ажиллах тухай Хамтарсан мэдэгдэл” 2003 онд, "Боловсрол, шинжлэх ухаан, соёлын салбарт хамтран ажиллах тухай Хамтарсан мэдэгдэл” 2003 онд тус тус байгуулсан.

Хоёр талын худалдааны эргэлтийн хэмжээ төдийлөн тогтвортой бус байна. 2004 оны эхний 9 сарын байдлаар хоёр улсын хооронд 4,3 сая ам.долларын худалдаа хийгджээ. 2004 оны 9 дүгээр сарын байдлаар австрийн талын оролцоотой нийт 1,975 сая ам.долларын хөрөнгө оруулалт бүхий 7 компани манай улсад бүртгэгдсэн байна.

Монгол-Австрийн Засгийн газар хоорондын хамтарсан комиссын анхдугаар хуралдаан 2003 онд зохиогдон эдүгээ хоёр удаа хуралдаад байна. Эдгээр ЗГХК-ын хуралдааны явцад хоёр талын худалдаа, эдийн засгийн эрх зүйн орчны асуудал, худалдаа, хөрөнгө оруулалтыг хоёр талын Засгийн газруудын зүгээс дэмжих боломж, арга зам, тухайлан австрийн Засгийн газрын экспорт, гадаад дахь хөрөнгө оруулалтын баталгаа, даатгалын тогтолцоонд Монгол Улсыг багтаах зэрэг худалдаа, эдийн засгийн хамтын ажиллагааны ерөнхий асуудлуудыг тодруулан ярилцсан.

Австрийн Засгийн газар манай улсад тохиолдсон байгалийн гамшиг, зудын үеэр тусламж үзүүлсээр ирсэн.

2004 онд В.А.Моцартын "Дон Жуан” дуурь Монголд анх удаа тавигдсан. Улаанбаатар, Вена хотын хооронд холбоо тогтоох анхны алхмууд хийгдэж хотын дарга нар харилцан урилга илгээгээд байгаа.

Австри Улсын Өргөмжит консулын газар Улаанбаатар хотноо 2004 оны 5 дугаар сарын 4-ний өдөр нээгдсэн бөгөөд Өргөмжит консулаар "Эрэл” компанийн захирал Д.Сэргэлэн ажиллаж байна.

Хатан хаан Сиси (1837-1898)

Kirden — Thu, 21 Oct 2010 19:25:03 GMT

Elisabeth Amalie Eugenie болон дууддаг нэр нь Сиси. 1837 оны 12-р сарын 24-нд Мюньхэн хотноо мэндэлжээ.

Тэрээр 1854 онд Франц Иосефтэй гэрлэсэнээр Австри улсын Их хатан болсон байна. 1867 оноос Унгар улсын Хатан хаан болсон юм.

Хайр дурлал ба Гэр бүл

1853 онд Австрийн Хун тайж Франц Иосеф 23 настай, мөн гэрлээгүй нэгэн байжээ. Түүний эх Хүдэр Ван Сопие түүнд сүйт бүсгүй хайж байсан юм. Тэрээр түүнийг Гүнж Мариа Аннатай, мөн Гүнж Мариа Сидони нартай гэрлүүлэх сонирхолтой байсан байна. 1853 оны зун Баварийн Вангийн хатан Людовик 2 охин Хелен, Елизабет нартай залуу хунтайжийн төрсөн өдрийн баярт уригдан, 8-р сарын 16-нд Бад Ишл хотыг зорьсон байна. Залуу дээдсүүдийг сүй тавьснаар, 1854 оны 4 сарын 24 өдөр залуу хосууд маань Вена хотноо гэр бүл болцгоожээ.

Хүүхэд ба Хүмүүжил

Хуримаас хойш жил шахам хугацаа өнгөрсөн байлаа. Сиси маань дөнгөж 17 настай байсан ба охинтой болсон байна. Охинд Франс Иосефийн эх, Сопие Фридрик хэмээх нэр хайрласан байна. Ирэх жил нь Гисела хэмээх 2 дахь охин мэндэлсэн байна. Шинээр мэндэлсэн охинийг хадам эх болох Сопие, асрагч эхд өгсөн ба Сиси хадам эхийн зөвшөөрөлгүйгээр охинтойгоо уулзаж болохгүй байсан байна. Мөн түүнийг охинтойгоо уулзах бүрт том охин Сопие байнга хамт байлцдаг байсан байна. Анхны аялал ба Унгар улсаар аялах үед түүний 2 охин хоёулаа өвдөж, 2 настай Сопие охин нас барж, 10 сартай байсан Гисела тун удалгүй эдгэрсэн байна. 1858 онд ханхүү Рудольф Франс Карл Иосеф мэндэлсэн байна.

Вольфганг Амадеи Моцарт (1756-1766)

Kirden — Thu, 21 Oct 2010 19:03:58 GMT

Вольфганг Амадеи Моцарт

Гайхамшигтай хүү.

1756 оны өвөл 1-р сарын 27 оройн 20 цаг. Сальцбург хотын Гетрайдэгассэ хэмээх гудамжны 9-р байшин буюу Хагенауэр Хаус гэх олон айлын орон сууцны 3-н өрөө байранд Моцартын гэр бүлд 7 дахь хүүхэд нь мэндэлсэн нь өдгөө та бидний сайн мэдэх Вольфганг Амадеи Моцарт юм.

Гетрайдэгассэ

1761 он буюу түүнийг 4 настайд эцэг Леопольд түүнд төгөлдөр хуур заасан болон ирээдүйн агуу их хөгжимчин болох замийг чиглүүлж өгсөн байна. Түүний анхний тайзан дээрх тоглолт, 1762 онд Мюньхэн хотод байсан байна. Энэ нь нэг ёсондоо хөгжмийн гурвал хамтлаг буюу эцэг Моцарт, эгч Моцарт, хүү Моцарт нар байсан байна. Мюньхэнд тоглосон тоглолт нь тэдний аялан тоглолтын гараа байсан ба 1762 оны намар Пассау хотоос Вена хүртэл Бяцхан авъяастнуудыг тухайн үеийн тайж, ноёдуудад танилцуулахаар зохион байгуулагдсан байна. 1763 оны 6-р сарын 9-д гэр бүлийн хамтлаг маань Герман улс болон баруун Европын орнууд руу хүлгийн жолоо залснаар 3 жил хагас буюу 1766 он 11 сарын 29 Сальцбург хот буцах хүртлээ аялан тоглосон байна. Энэ аялал маш их Амжилт, үр дүнтэй аялал болсон ба Лондон хотноо Иохан Кристиан Бахтай танилцсан байна.

Иохан Кристиан Бах

- Миний мэдэх Австри орон -

Kirden — Thu, 24 Jun 2010 20:35:58 GMT

Сайн байна уу? Та Австри улсыг хэр сайн мэдэх вэ? Би тэгвэл танд тус улсын талаарх өөрийнхөө мэдлэгээсээ хуваалцая.

Австри улс нь Европ тивийн төв хэсэгт оршдог бөгөөд манайхны ярьдаг Азийн зүрх гэдэг шиг Европын зүрх гэж бас ярьдаг. 83000 км² орчим газар нутагтай, Монгол улсаас 20 дахин жижиг, 3 дахин их хүн амтай улс юм байна. Ойролцоогоор 8 сая гаруй хүн амтай.
Хүн амын статистик судалгааг авч үзвэл 2010 оны судалгаагаар:
14.3% нь 0-14 нас ( эр 599,735 / эм 571,690 )
67.6% нь 15-64 нас ( эр 620,782 / эм 2,762,789 )
18.1% нь 65-аас дээш нас ( эр 620,782 / эм 869,661 )
Нийт хүн амын 91.1% нь Австри, 4% Югослав ( Харват, Словен, Серби, Босни ), 1.6% Турк, 0.9% Герман, 2.4% бусад улс үндэстэн эзэлдэг байна.

Тус улс нь Швецарь, Герман, Чех, Словак, Унгар, Словен, Итал улсуудтай хил залгадаг ба Дайны дараах үеүүдэд хоригдогсдод, хамгийн ихээр тусламж, дэмжлэг өгч байсан гэдгээрээ одоог хүртэл Европ тивд Онцгой Засгийн газартай хэмээн үнлэгддэг байна. 1995 онд албан ёсоор Европын холбоонд нэгдсэн ба 2002 онд мөнгөн тэмдэгт болох Шиллинг нь Евро мөнгөн тэмдэгтэд шилжсэн байна.
Ерөнхийлөгчийн засаглалтай ба Ерөнхийлөгч Хайнц Фишер нь 2004 оны 7-р сарын 8-д анх удаагаа тус суудалд сонгогдсон. Тэрээр тус суудалд 6 жил суух ёстой ба 6 жилд 1 удаа Ерөнхийлөгчийн сонгууль болдог байна. Энэ жил буюу 2010 оны 4-р сарын 25-нд ээлжит сонгуулиар тэрээр илт давуу буюу 79.3% санал авснаар дахин 6 жил суух эрхтэй болсон байна. Эндээс ард түмний түүнд итгэх итгэл, түүний ард түмнээ, эх орноо гэсэн хандлага хэр их байдгийг та ойлгож байгаа биз дээ!
Австри улс нь Демократ Засгийн газартай ба өөрийн гэсэн үндэсний хэл байхгүй бөгөөд Герман хэл нь тэдний үндсэн хэл болдог байна. Анх би Австри улсад ирээд өөдөөс Германаар яриад байхаар нь Германд ирчихсэн юм болов уу гэж гайхаж байсан шүү! Яг үнэндээ Австри улсын талаар мэдлэггүй нэгэн байсан юм л даа.
Хилийн зурвас 2562 км урт. Чех 362 км, Герман 784 км, Унгар 366 км, Итал 430 км, Лихтенштайн 35 км, Словак 91 км, Словен 330 км, Швецарь 164 км.
Хамгийн өндөр уул буюу цэг нь 3798 м өндөр Гроссглокнер оргил ба хамгийн нам дор цэг нь далайн төвшнөөс 115 м гүн Нюьсидлер нуур юм байнa.
Нийслэл хот нь Вена ( Wien ) ба Вена мужид харъяалагдана. Венийн Вальс гэхээр та ойлгож байгаа биз дээ. Тэр чинь юм шүү дээ.
Үндсэн 8 мужтай ба манайхаар бол аймаг л юм уу даа. Niederösterreich, Oberösterreich, Steiermark, Kärnten, Burgenland, Salzburg, Tirol, Vorarlberg гэх мужуудтай юм байна. За тэгээд муж тус бүр нь хоттой, хот хөдөөгийн ялгаа гэж бараг байхгүй. Энд амьдардаг Монголчууд л хөдөө энэ тэр гэж ярьдаг юм. Яагаад ингэж хэлж байна гэхээр би өөрөө Монголчуудын хэлдэгээр хөдөө амьдардаг юм л даа. Гэхдээ миний хувьд хөдөө биш юм шүү дээ!
Суут уран бүтээлч Амадеи Моцарт чинь Сальцбург хотын иргэн юм байна. Магадгүй таны шүтэн биширдэг уран бүтээлч байж болох юм л даа.

Мөн та бидний үзэх дуртай Терминатор киноны гол дүрийн жүжигчин Арнолд Шварценеггер бас Австри улсын уугуул иргэн юм. Тэгээд цаашилбал олон алдартнууд тус улсаас төрсөн гээд тоочвол олон хүмүүс байдаг юм байна. Би дараа дараагийн дугаартаа тэдгээр хүмүүсийн талаарх дэлгэрэнгүй мэдээлэл танд хүргэнээ. За тэгээд Австри орон маань Хөдөө аж ахуй, техник технолог, боловсрол, соёл, шинжлэх ухаан гээд өндөр хөгжилтэй орнуудын жишигт хүрэхүйц хөгжилтэй улс юм. Шашин шүтлэгийн хувьд Католик, Христ, Мусульман, Буддист гээд бүх л шашны урсгалтай.